政情：工會絞盡腦汁谷五一遊行

職工盟利用聚餐谷大遊行人數，當日先喺上晝搞個「團結聚餐」，假長沙灣一間屋邨酒樓筵開數十席，餸菜豐富，有燒味拼盆、粟米羹、金栗斑塊、貴妃雞、魚香茄子煲等，雖然菜式唔算名貴，但每位盛惠四十大元，食飽飽之後，就齊齊坐旅遊巴去維園參加大遊行。職工盟統籌幹事蒙兆達就話，年年都有搞聚餐，收費只係成本價，工會只係包車費，過去每年都有幾百人參加，效果好唔好，真係見仁見智。

工聯短片吸引80後

全港最大工會工聯會，今年就利用短片作招徠，將以往遊行啲片剪接成「約定你，遮打見」，呼籲打工仔五一站出來爭取權益，條片仲放響YouTube做宣傳。其實佢哋最少一年前已成立咗一隊人專門拍片同影相，將工聯會啲記者會即時放上網，今次用短片宣傳呢招，明顯係想吸引班八十後參加遊行。