政情：任志剛樂做中大生招牌

身為中大工商管理學院名譽教授嘅任志剛，做咗金管局總裁十六年半，生活急速，工作壓力又大，佢話當劉校長邀請佢重返學術界時，即時欣然接受，佢講笑話：「差不多要攬住佢（劉遵義），然後話好呀，好呀！」任志剛話，以前辦公室喺國金八十八樓，一望出去只係見到「一舊雲」，而且要密切留意市況，所以一日到黑要開住即時新聞，搞到耳根不能清淨；將來喺中大返工，滿目青葱翠綠，環境又清幽，喺度做研究對身心都有好處。至於人工幾多，任志剛唔肯透露，只肯話自己唔使為錢工作。

主要有三大職責

任志剛呢份新工主要有三大職責，首要係做研究工作，主力研究人民幣喺國際體系嘅角色，同時由本地層面出發，睇吓香港點可以穩住國際金融中心嘅地位；其次是九月起向中大經濟系同工商管理系嘅學生授課，初步計劃教貨幣銀行學（Money and Banking）；再者係教研究所新開辦嘅行政人員課程講師，對象係銀行、保險、經紀業界嘅高級專業人士同行政人員，向佢哋講解重要嘅經濟議題，每項課程為期一至兩個星期。

行政人員課程嘅學費未定，不過肯定唔平得去邊，任志剛尋日喺記者會上賣花讚花香：「課程價錢偏高，不過值得㗎！」身為經濟學家嘅劉校長都會親自開班授徒，研究所仲會邀請知名學者同決策者來港演講，至於係咪好似任志剛所言咁物有所值，要上過堂先知，不過研究所除咗請到任志剛出山外，仲邀請到兩名諾貝爾經濟學獎得主莫理斯爵士同蒙代爾教授作研究員，齋睇牌面就夠晒吸引啦！