中環耳目：KK愛食上水「八八番」日本菜
好多出色食肆都集中喺中環、尖沙咀等旺區開業，但其實新界區食肆亦臥虎藏龍，禾稈冚珍珠。家在上水嘅工聯會立法會議員黃國健（KK），每當想食日本菜，都會幫襯番屋企附近馬會道166號嘅「八八番」壽司魚生專門店，佢大讚呢間店富有日本小店風情，但最重要係食物夠晒新鮮，最鍾意就係雞骨腸同多春魚，仲有新鮮嘅魚生。
KK話，「八八番」嘅多春魚同魚生新鮮程度唔使多講，而雞骨腸就好多汁，食落唔係太鹹，清清哋幾好味。原來KK已經幫襯咗「八八番」十幾廿年，呢間店主要做熟客及街坊生意，所以魚生買得快、去得快，能夠保持新鮮，而且價錢唔算貴，只係中等價錢，所以好值得推介。
網上食評佳
「八八番」喺網上嘅食評唔錯，好多網民都驚訝上水都可以食到上乘嘅日本壽司魚生，其實店內仲有好多正嘢，好似A4級上等神戶牛肉，入口即溶，去開上水可以去試吓！
卓妮