中環出更：黃永光着TOD'S鞋巡地盤唔怕跣
電影《歲月神偷》有兩句經典對白：「鞋字半邊難、鞋字半邊佳」、「一步難、一步佳」，原來信和置業太子爺黃永光（Daryl）着鞋都有先難後佳嘅滋味。Daryl早前入馬場拉頭馬，見佢着到西裝骨骨，配上一對意大利品牌TOD'S嘅軟身皮鞋，細問之下，就發現佢着TOD'S鞋背後原來有個巡地盤嘅故事。
獨特膠粒夠啜地
Daryl依家係信置執行董事，日理萬機，經常要協助父親黃志祥巡視信置旗下樓盤建築地盤，佢話以前着普通傳統皮鞋，皮質鞋底遇上地盤沙石會好跣，好易「出事」跣倒。黃太愛夫心切，建議Daryl改着TOD'S皮鞋，點知一着覺得好舒服，獨特嘅鞋底膠粒又夠啜地，巡地盤啱晒，襯西裝都好好睇，所以依家經常着TOD'S皮鞋。
一對TOD'S皮鞋要數千元，好似Daryl嗰款軟皮鞋就盛惠三千幾元。據說一對TOD'S鞋製作過程經過逾一百道工序，每道工序一絲不苟，TOD'S用嘅皮革多達三十五種，加上自家製嘅粒粒軟底，出名舒適與時尚並重，着上腳肯定只有個「佳」字，所以幾千元一對鞋真係物有所值。
卓妮