中環出更：超雲拍拖不忘孝敬賭王
賭王何鴻燊千金何超雲，同皮草太子爺男友王大業（Andy）感情穩定，唔介意喺鬧市公開晒恩愛，大前日（周二）佢又同男友Andy十指緊扣行中環。超雲拍拖不忘爸爸，去咗名人至愛嘅COVA餐廳外買蛋糕，原來賭王何鴻燊好鍾意食COVA嘅西餅。
買COVA蛋糕分甘同味
平日打扮艷麗嘅超雲，同男友行街街時突然返璞歸真，穿上黑色吊帶背心，下襯帆布鞋，十足鄰家小女孩，兩人把臂同遊中環，畀卓妮撞到正。當時係夜晚七點，超雲本來諗住搵餐廳撐枱腳，突然醒起爸爸鍾意食蛋糕，馬上拉男友飛快走入歷山大廈間COVA。兩口子喺蛋糕櫃前左望右望，睇見色彩繽紛嘅西餅，非常雀躍，一口氣掃咗幾款熱賣口味，然後行去舊中銀大廈附近攞車。
Andy當日出動黑色Benz跑車接載女友，卓妮上前同超雲打招呼，手中揸住本書嘅Andy見到鏡頭顯得怕怕醜醜，低頭笑而不語。見慣大場面嘅超雲就淡定得多，全程保持微笑，幸福盡在不言中！
講起爸爸最新近況，超雲話，賭王回家休養後康復神速，最鍾意食蛋糕，所以買幾件靚西餅同爸爸分甘同味。臨上車前，Andy盡顯紳士風度，大方地為女友開車門，等伊人上車後先登上座駕做柴可夫。
COVA嘅蛋糕一向出色，城中名人經常相約去COVA high tea，歎番件出名香滑嘅藍莓芝士餅，或者品嘗吓充滿芝士及忌廉香氣嘅Tiramisu，人生一樂也。COVA嘅朱古力餅都係好多人嘅至愛，立法會議員梁美芬得閒最鍾意去九龍塘嗰間COVA飲番杯熱朱古力，貪佢嗰度近自己教書嘅香港城市大學。
卓妮