近年兩岸吹暖風，煲呔曾早前委任自己馬房嘅鬍鬚曾曾俊華做港台經濟文化合作協進會（經協會）榮譽主席，一心幫鬍鬚曾谷人氣，點知全世界當鬍鬚曾透明，無人談論佢，更無人記得佢同台灣有乜關係。被人冷落最唔好受，所以，鬍鬚曾尋日喺私人網誌賣膏藥，硬銷自己嘅「台灣因緣」，未郁手推動台港，先為自己薄弱嘅台灣關係做急救。
鬍鬚曾尋日份網誌以「台灣因緣」為題撰文，一開頭就話，自從今個月初成立咗經協會，各方朋友反應熱烈，真係好有此地無銀三百両嘅味道。
跟住鬍鬚曾仲狂晒人脈，由年輕時喺美國讀大學有好多台灣書友，做港府財金官員時同好多台灣官員打交道，一路講到上年返東莞聽台商分享珠三角經商嘅經驗。
不過佢「晒冷」晒到盡，只能暴露出佢同台灣關係其實幾咁薄弱嘅真相，仲講到讀大學嗰陣，都幾十年前啦。大家最後聯想到嘅，可能係佢一度成為政壇笑話嘅蹩腳普通話喎。