政情：王桂壎或冧莊律師會

律師會繼去年推動「師友計劃」，扶持及關懷年輕人後，今年再添食，反應咁好，王桂壎都喜出望外，但佢自嘲年紀大，形象似爸爸多過大哥哥，寧願搵班義務律師幫手。

除咗忙做義工，王桂壎近日亦忙於趁換屆前交張漂亮成績表，包括爭取改革律師事務所模式，又忙於拜訪快將換屆嘅深圳律師會。計劃多多，做唔做得切㗎？被記者咁問法，王桂壎忽然爆出一句：「可能做多一屆會長，咁啲時間咪鬆動啲囉！」睇嚟佢成竹在胸，做多一屆應該問題唔大。

丈夫咁忙，太太要爭取時間相聚，例如尋日王太就陪老公出席一個公開活動，王太話，老公出外公幹，佢都夫唱婦隨，不過千祈唔好以為王桂壎出埠時會百忙中抽空陪太太行街買嘢，事實係當老公做嘢，太太只能自得其樂，辦完公事就趕住返香港。係唔係委屈唔緊要，心甜就得喇。