政情:蔡李惠莉禁毒展歌喉

如今做名媛,要多才多藝,八面玲瓏。好似玩具大王蔡志明太太蔡李惠莉咁,唔止善心,仲係唱得之人。蔡太尋日粉墨登場為女童軍禁毒大匯演獻唱,初試啼聲,唱得有板有眼。

場表演喺紅館舉行,大會請咗一位曾沉淪毒海嘅少女現身說法,仲搵嚟一眾名太以音樂劇方式宣揚禁毒訊息。蔡太身為女童軍總會名譽副會長,當然唔可以匿埋幕後。佢開咪以普通話唱出《藍色多瑙河》,向來喺教會唱開聖詩嘅佢,聲線嘹亮動人。

原來蔡太曾拜名師學聲樂,表演前更喺屋企秘密練兵。果然上台表演時交出水準,絕無怯場。睇真啲,原來囡囡加怡同囝囝加讚靜雞雞喺台下為媽媽打氣,怪唔得蔡太特別投入。

富豪邱德根新抱邱吳惠平都有份表演,唱出英文歌《What a Wonderful World》,引來全場掌聲。