政情：田少放低總商會包袱

總商會將於五月三十一日舉行換屆選舉，主席包立賢夠鐘卸任，正、副主席接班團隊大局底定，主席之位由常務副主席胡定旭接棒，周松崗升任常務副主席，「小超人」李澤鉅同中銀香港總裁和廣北連任副主席，餘下一個副主席位置據聞已有接班人選，由置地首位華人總裁彭耀佳嚟坐。

總商會換屆，令人諗起上年田少大意失荊州，今年會唔會又捲土重來撐中小企上位？我哋問過田少，佢話，至今未收到尋求支持爭逐理事會嘅電話，楊國琦亦向佢表明心迹，上年失落副主席後已感意興闌珊，唔會再競逐，所以，今年總商會換屆，佢落得清靜，而且，五月三十一日佢仲會離開香港添。

難奪回林健鋒議席

咦，田少喺總商會換屆日子離港，唔通為咗避戰或者遠離是非漩渦？田少叫大家唔好咁心多，只係因為旅發局趁上海舉辦世界博覽會，於是六月喺上海推廣香港旅遊月活動，身為旅發局主席嘅佢，要喺三十一日飛上海，出席旅遊月活動開幕式啫。

田少仲話支持彭耀佳做總商會副主席，覺得彭係有能之士，而肥胡本身已經係常務副主席，按傳統接任主席之位，佢亦表示支持。田少講得咁清楚，睇嚟今年總商會換領導層，都無乜懸念囉，一心等睇熱鬧嘅觀眾，可能會失望嘞。

總商會近年日趨政治化，常有政治新聞見報，「3L」脫離自由黨、另起爐灶成立經濟動力之後，自由黨一直想從林健鋒手中取回總商會立法會代表個位，但從今年總商會換屆睇嚟，自由黨逐漸淡出總商會地盤，大勢已成，要重奪立法會代表議席難度又高咗，依家最開心嗰個，相信應該係林健鋒同煲呔曾！