中環耳目:李文斌愛da Domenico頂級意菜

意大利菜喺香港大放異彩,一碟賣逾五百元嘅鮮蝦意粉,一樣大受歡迎。位於銅鑼灣開平道嘅da Domenico,稱得上是低調嘅富豪飯堂,老闆唔做訪問,依然吸引賭王何鴻燊等貴客光臨。理文造紙太子爺兼仁濟董事局副主席李文斌(Edmond)都係da Domenico常客,最難抗拒係海鮮意粉誘惑。

鮮蝦意粉500蚊

Edmond話,da Domenico人氣旺,訂枱愈來愈難,但為咗氹太太開心,每隔三、四個月就嚟幫襯一次,每次必點招牌菜海鮮意粉,太太Amanda都鍾意食海鮮,不過依家佗緊龍鳳胎,要暫時戒口,清清哋食吓沙律算嘞。

da Domenico老闆對食材極之講究,由蔬菜、肉類到海鮮,全由意大利入口,連沙律用嘅黑醋,都係陳年意大利黑醋。大廚炮製嘅鮮蝦意粉好似落咗魔法咁,即使每碟盛惠五百幾銀,食客依然搶住要。賭王燊哥食過翻尋味,經常同埋三太陳婉珍、四太梁安琪及仔女嚟共享天倫。

卓妮