中環出更：鄧慶治反轉呔大玩狂放

博愛總理鄧慶治（Mingo）經常喺人群中特別顯眼，事關佢揀呔嘅品味零舍唔同，好容易就吸引到卓妮嘅注意。好似早前卓妮喺快活谷撞到佢同女友拍拖入場，佢嗰條Fornasetti領呔望落好似反轉咗，勁有創意！

Mingo話佢就係鍾意呢隻牌子嘅呔玩嘢夠狂放，設計花款又好特別，好似佢當日戴嗰條寶藍色領呔，招牌就喺正前面，感覺好似反轉咗。而花款亦夠出位，呔上有隻手拉住條繩，真係好搞嘢。

Mingo係Canon佳能香港副總裁，近年Canon嘅廣告都好出位，同Mingo嘅品味好啱頻道。佢係本港設計師鄧達智嘅阿叔，可能佢都有啲家族遺傳嘅藝術基因。

Mingo話畀卓妮聽，佢喺十幾年前發現咗呢個品牌，當時一次過掃五條咁多，每條要千幾元，但近年喺香港已經搵唔到佢哋舖頭。查實Fornasetti源自意大利，佢哋創始人係Pop藝術大師Piero Fornasetti，其原創設計有好濃烈嘅個人風格，除咗呔同服飾之外，佢哋嘅傢俬喺全球都有好多粉絲㗎！

卓妮