中環出更：「爆冷」捧盃賭王家中睇直播
尋日沙田馬場舉行「愛彼錶女皇盃」國際一級賽事，好多城中名人扮到靚靚入場，馬迷亦都費盡心思製作打氣標語為愛駒打氣。賽前大熱嘅「威利旺旺」馬主莊友堅，喺十幾位老友助陣下準備捧盃；何家大小姐超雄、賭王四太梁安琪帶埋孖仔猷亨、猷君同埋超欣入場。結果賭王嘅「爆冷」以十六倍賠率跑出，何家大細喜出望外，四太梁安琪更加high爆，高興到同馬會主席陳祖澤攬頭攬頸添！
今次係繼○七年之後，「爆冷」第二次喺「愛彼錶女皇盃」奪冠，計埋尋日捧走嘅八百萬元頭獎獎金，「爆冷」累積贏得嘅獎金已經超過八千萬，認真生性。四太話，賭王原本想入場睇愛駒出賽，但由於對隻馬信心麻麻，所以留喺屋企睇電視直播。知道愛駒跑出後，賭王都讚呢隻八歲愛駒「老當益壯」添！
猷君話想做馬主
被賭王讚係何家最靚淑女嘅超欣話，今次係佢第一次拉頭馬，所以好開心，「爆冷」衝線一刻佢都好肉緊打氣。猷君話長大後如果父母允許，佢都想做馬主，因為始終係做善事。四太就即時喺馬主廂房選購現場展示嘅愛彼錶，最貴嘅要二十幾萬元，但個款唔係好啱，四太想要兩隻運動型嘅男裝錶，唔知係咪要送畀兩個囝囝？
陳南祿拒談去向
卓妮又見到啱啱宣布辭去太古（中國）主席職位嘅馬會大董陳南祿（Philip），梗要追問佢嘅新去向。不過Philip依然笑容燦爛，但乜都唔答。飲食界立法會議員張宇人尋日都有馬出賽，佢話最低工資掀起嘅風波冇帶畀佢壓力，有好多人批評佢，但係都有好多人支持佢，仲話自己一路保持一百七十磅嘅體重，冇瘦到噃！
卓妮