政情：林煥光撐最低時薪$33
廿蚊、廿四蚊定三十三蚊？張宇人因為出嚟講最低工資，惹火焚身，香港廠商聯合會會長黃友嘉話社會對最低工資嘅討論唔健康，索性喺諮詢期內都唔會提出時薪建議。最低工資成為惹火議題，平等機會委員會主席林煥光無有怕，前日上完電台講殘疾人士嘅最低工資水平，尋日又上論壇，妙論最低工資，仲展露搞笑本色添。
林煥光話，自己成日上茶餐廳，平時都有做過統計，數吓幫襯開嘅餐廳有幾多樓面夥計，有幾多茶客，自己平時又會消費幾多錢咁。結論係，即使最低工資訂喺最高嘅三十三蚊水平，以佢食開嘅常餐價錢，只要加一蚊至個半，已經彌補番晒啦。況且，過去一年，佢食開嗰份常餐加價加咗都唔止一蚊啦！所以，林煥光話贊成最低工資立法，保障基層勞工可以有尊嚴咁生活。
香港社會為最低工資拗嚟拗去都未拗掂，林煥光去茶餐廳食個常餐啫，就完全諗通晒，想唔畀個「叻」佢都唔得！香港依家正值政改爭拗，特區政府同民主派講數陷僵局；不如林煥光下次去茶餐廳食早餐時，又幫政府度度橋吖。