政情：方剛中西合璧醫盆骨
自由黨副主席方剛（Vincent）早前講起自己隻腳有啲痛，仲講笑話未做特首，已經腳痛，但當時大家都唔知發生乜嘢事。事隔兩個星期，真相大白，原來佢係盆骨出事，依家行路都拐吓拐吓，連一向心愛嘅高爾夫球同滑雪，暫時都要放低。為咗盡快治療好盆骨傷勢，Vincent除咗睇西醫，仲做埋針灸，中西合璧治療，我哋喺度祝佢早日康復！
尋日我哋見到Vincent，問起佢嘅盆骨傷勢，佢講咗一句：「麻麻哋。」跟住就上車離開。雖然Vincent無詳細交代傷勢，但聽聞佢已經用緊中西合璧方法治療，雙管齊下，上星期Vincent由北京返港開立法會，一身中藥味，相信就係接受緊中醫診治。勞工界議員李鳳英舊年初喺立法會大樓失足滾落樓梯，搞到盆骨移位，手尾都幾長。最低工資同政改殺到埋身，希望Vincent快啲好番，全力打仗啦！