政情：陳健波踩怪醫未達標？
立法會前日辯論勞工及福利局局長張建宗減一個月人工嘅修正案，保險界陳健波語重心長叫大家咪一竹篙打一船人，唔好因為一項政策成敗，就開減人工嘅壞先例。波哥仲將事件引伸到功能組別，話唔好因為個別功能組別言行有問題，就鬧晒所有功能組別議員，力陳「五散人」幾位議員有心有力，但唯獨無提及「五散人」中嘅醫學界「怪醫」梁家騮。
身為「五散人」黨鞭嘅波哥話，議員最低限度有三項「基本功」要做好，包括出席率、投票率及發問率，做好呢三樣起碼少一個機會畀市民詬病。唔通怪醫因為出席率未達標，搞到波哥無開聲讚佢？不過，一向厚道嘅波哥就冇特別指明邊啲係唔達標嘅議員。
波哥又話，自從飲食界張宇人提出「廿蚊論」後，無論直選定係功能組別嘅議員，都鬧爆張宇人冇人性，爭住同佢割席，可見功能組別絕對唔會偏幫功能組別喎！