政情：莊友堅嘆養馬難過炒股
馬主兼股壇名人莊友堅（Eugene）近排喺股市大有斬獲，幾個月前佢趁低買入美股花旗銀行，帳面賺嘅足夠買隻過千萬元靚駒。不過佢做咗馬主十三年，依家都未回本。Eugene話養馬風險高過炒股，所以佢養馬唔講投資回報，而係專心享受贏馬一刻嘅過程。
嚟緊星期日，Eugene有好大機會威威啦！事關佢隻由蚊型股變身大藍籌嘅愛駒「威利旺旺」，將代表香港與來自全球嘅馬仔喺「愛彼錶女皇盃」國際一級賽事競技。
自信女皇盃拉頭馬
Eugene話，冰島火山爆發令部分馬匹喺外國嚟唔到，即使嚟到都未必適應香港潮濕溫暖嘅天氣。佢笑謂自己冇理由唔贏，仲預咗大開香檳慶祝；如果馬場畀嘅話，最好放埋煙花添！
Eugene當年斥資八百萬元買「威利旺旺」，至今賺到嘅彩金未計分畀練馬師共約四百萬元，今次若勝出，將贏得五百六十萬元頭馬獎金，分分鐘可回本。不過，佢話養馬講回報係戇居，因為輸咗就乜都冇，唔似炒燶股仲有啲渣剩。不過佢話只要馬仔血統正、訓練好，贏面都大嘅！
專炒細價股嘅Eugene近排愛上大藍籌，幾個月前喺2.5美元價位買入花旗，依家股價升咗成倍。佢唔肯講買咗幾多或賺幾多，只形容花旗係佢歷來最好嘅投資，帳面賺到嘅足夠買隻全世界最貴嘅馬。佢都曾經喺三、四十元入咗大笨象滙豐，八十幾元放咗，都賺到笑啦！
Eugene一向好豪氣，我哋喺佢位於北角華匯中心嘅大本營見識咗佢嘅排場。佢喺華匯有幾層物業，其中三十樓全層設有過萬呎嘅私人飯堂同埋健身室。貴賓房有形影不離嘅股票機方便佢
實個市，仲有張足球枱（Foot Ball Table）畀佢同朋友耍樂，原來佢都童心未泯㗎！