政情：張宇人玩神秘嚇劉健儀
自由黨副主席張宇人早前發表最低工資時薪廿蚊嘅言論，結果引火自焚，搞到要出嚟道歉，該黨主席劉健儀（Miriam）仲立即召開記者會，同佢劃清界線，事前連打個招呼都冇，Miriam之後仲勁插張宇人無「說話的藝術」先搞爛檔攤。盛傳張宇人覺得Miriam做得太絕情，所以早兩日公布飲食界最低工資調查前，事先唔肯將調查結果知會Miriam，扮神秘嚇吓佢，等佢估估吓，歸根結柢都係心中有氣！
由得Miriam自己睇記招
其實張宇人公布飲食界調查結果，不約而同與自由黨嘅立場看齊，都係贊成將最低工資訂喺不高於廿四蚊水平。不過，Miriam同張宇人都話冇夾過，張宇人仲同我哋講，開記招前根本冇將調查結果知會自由黨，因為覺得根本冇呢個需要喎！何解呢？張宇人發晦氣話，既然自由黨由佢發表「廿蚊論」以來，一直都話佢嘅意見不代表自由黨立場，咁之後佢發表嘅相關言論，應該都唔會同黨有太大關係喎，所以唔覺得要知會Miriam噃。張宇人仲話，更何況Miriam由始至終都冇親口問過佢有關嘅結果，所以就由得Miriam自己睇記招就算喎！
Miriam咁緊張，原來都係擔心張宇人再發表低於自由黨立場贊成嘅最低工資水平，搞到「廿蚊風波」沒完沒了。Miriam仲自爆，喺張宇人公布飲食界結果前，佢特登問過自由黨職員，到底張宇人有冇講低調查結果，不過職員話張宇人唔肯講，佢惟有等記招結果。好彩最後大家立場一致，Miriam都話覺得好開心，起碼唔使再四出解釋，又話好希望大家分清楚，之前嘅風波其實都唔關自由黨事，叫大家唔好再誤會自由黨喎。
Miriam講嚟講去都係要同張宇人劃清界線，唔知呢一對正副主席以後如何喺自由黨合作落去？