中環耳目：夏佳理至愛輝哥麻辣火鍋

身兼行政會議成員嘅港交所主席夏佳理（Ron），本身係中國和巴基斯坦混血兒，不過佢嘅飲食習慣係百分百中國口味，朝早起身鍾意食白粥油炸鬼。佢食嘢愛濃味，XO醬、麻辣火鍋都係佢嘅最愛。阿Ron平日不時捧灣仔「輝哥火鍋」場，必食入口即溶嘅肥牛配麻辣湯底。
夏佳理愛濃味嘅食物，經常幫襯「輝哥火鍋」。（徐家浩攝）
夏佳理愛濃味嘅食物，經常幫襯「輝哥火鍋」。（徐家浩攝）

秘製非一般湯底

「輝哥火鍋」喺火鍋界內響噹噹，政府官員和各國駐港領事、藝人都係常客。研究飲食廿幾年嘅老闆游志輝話，該店喺山東自設幾個大農場，牛隻為澳洲與中國黃牛配種，加上以日本優質模式飼養牛隻，食落特別鮮甜味美。

「輝哥火鍋」嘅肥牛入口即溶，鮮甜味美。（何偉鴻攝）
  • 「輝哥火鍋」嘅肥牛入口即溶，鮮甜味美。（何偉鴻攝）

至於鎮店嘅麻辣火鍋，輝哥話湯底選用嘅辣椒材料均來自四川，包括指天椒、生香椒、登龍椒、香茅及三十多種秘製材料，加上乾濕蒜蓉、芝麻醬及沙茶醬等配料，炮製成非一般麻辣火鍋，麻辣過程由淺至深，感到麻辣嘅同時又享受到食物鮮味，令人回味無窮。

阿Ron嚟食火鍋，常自備紅酒，呢度美中不足嘅係不設咖啡機，阿Ron餐後想同朋友歎杯咖啡傾吓偈，都被迫要飲即溶咖啡。阿Ron忍唔住，自掏腰包送咗個咖啡機畀輝哥，飯後有靚咖啡飲，咁就完美嘞！

卓妮