中環出更：超鳳撐愛女母校出錢出力
名校拔萃女書院今年一百五十周年校慶，校方斥資近四億元重建佐敦道校舍，尋日舉行奠基儀式，名人舊生及學生家長踴躍撐場，出錢又出力，其中一位家長就係賭王何鴻燊女兒何超鳳（Daisy），現擔任校慶籌委會副主席。卓妮同Daisy傾開，發現佢原來唔係拔萃舊生，當年就讀聖保祿學校，但為何安排兩個愛女入讀女拔呢？
賭王歎福臨門到會
Daisy好坦白話，當年讀聖保祿，好多公開比賽都係女拔攞冠軍，好自然希望自己兩個女兒能夠讀間叻學校，大女已經畢業到外國升讀大學，目前細女正讀緊中學，作為學生家長好應該支持學校發展。
問到燊哥近況，Daisy話爸爸近排幾好，尋晚一家人就喺屋企食飯，安排咗爸爸喜歡嘅灣仔富豪飯堂「福臨門」到會，食得相當開心。
至於太太和孫女就讀拔萃嘅前立法會議員丁午壽，都有幫學校籌款，佢話籌款進度理想，仲差少少就達標，卓妮建議佢包底，點知丁午壽話：「講笑咩，我邊有本事包底呀！」
蒙德揚捐天文儀器
女兒同樣喺拔萃就讀嘅信興集團副主席蒙德揚（蒙仔）亦全力協助學校重建。蒙仔話，佢負責幫手睇住學校設施，仲話待新校落成後，信興都會捐啲天文儀器畀學校喎，認真大手筆！
作為「舊生」嘅前環境運輸及工務局局長廖秀冬及前衞生福利局局長霍羅兆貞尋日都有撐母校。冬冬中一至中七都係讀拔萃，對母校感情深厚，每逢搭車經過母校都會望多幾眼。
尋日出席嘅嘉賓仲有合和實業主席胡應湘（哥頓），哥頓聲言同女拔無乜關係，但大讚女拔辦得好，所以出席以示支持。
其實女拔名人家長仲有好多，好似前民政事務局局長何志平、運輸及房屋局局長鄭汝樺、前總商會主席蔣麗莉等，尋日蔣麗莉仲攞住部相機幫囡囡影相，愛女心切，好肉緊！
卓妮