政情：梁高美懿去旅行叉足電

恒生女大班梁高美懿（Margaret）係城中女強人嘅表表者，每日返工統領銀行近萬大軍之餘，閒時都好熱衷同社會各界分享自己嘅成功心得。尋日Margaret以國際成就計劃香港部主席嘅身份出席「學生營商體驗計劃」畢業禮，唔止大講佢嘅營商之道、袋錢落一眾學生袋，當佢欣賞班學生獻唱韓國人氣組合Wonder Girls最近熱爆全城嘅作品《Nobody》時，仲起埋身好投入咁同佢哋一齊跳，令全場氣氛沸騰到極點。
Margaret（後排粉紅衣者）尋日同班學生分享自己嘅營商之道，仲勉勵佢哋遇困難唔好輕易放棄。 （何偉鴻攝）
Margaret（後排粉紅衣者）尋日同班學生分享自己嘅營商之道，仲勉勵佢哋遇困難唔好輕易放棄。 （何偉鴻攝）

Margaret雖然日理萬機，但女強人都要抖氣叉電嘅時候。佢同我哋講，喺啱啱過去嘅復活節，佢請咗兩星期假，一家四口一齊去意大利同瑞士旅行。去旅行最怕舟車勞頓，識玩識歎嘅Margaret就選擇自駕遊，免卻轉車同行到腳軟之苦。佢仲自爆自己喺意大利買咗唔少靚鞋靚衫，又歎咗好多地道菜式添。Margaret把握機會去旅行叉電，一返香港做嘢時就精力十足，或者呢個就係佢喺金融界嘅成功之道！

Margaret（右）睇學生獻唱時，亦聞歌起舞起身跳埋一份，好投入！
  • Margaret（右）睇學生獻唱時，亦聞歌起舞起身跳埋一份，好投入！