政情：李慧琼臨時甩底皆因「皇命」難違
上星期三政改方案出台，建制派飯局秘密開餐，中聯辦吹雞敦促大家務必出席以示大團結。不過政壇新星李慧琼竟然無影，唔係學咗啲明星咁未紅先驕嘛？
唔係唔係，李慧琼只係皇命難違啫，呢道密旨係李慧琼個寶貝皇帝女親自落嘅。話說嗰晚佢老公有事要外出，慧琼出發前收到小公主嘅電話︰「媽咪，你可唔可以返嚟陪我呀！」愛女嗲功力壓千斤，試問邊個媽咪頂得住？雖然心繫愛女，但呢位「新星」仍然好忙，好似早兩日佢喺立法會開完會，就同黨友議員陳鑑林趕去為青海地震籌款，之後趕急去快餐店買飯盒醫肚，再趕開立法會內會，認真夠忙！