政情：建制派今杯葛《城市論壇》

建制派議員表態杯葛《城市論壇》後，節目監製兼主持謝志峰先後致電民建聯主席譚耀宗、劉江華及自由黨主席劉健儀，表示已經為論壇訂立新規矩，即與「維園阿哥」任亮憲等人「約法三章」，要求佢哋與嘉賓保持五呎距離，動口不動手，亦唔准掟雜物及講粗口，並增加三名保安員維持秩序，但三人仍然拒絕邀請，佢哋要觀察日後嘅論壇秩序係咪有改善，先決定係咪再出席。

港台似乎願意亡羊補牢，但多名建制派議員就繼續炮轟《城市論壇》，民建聯黃定光狠批港台保障唔到參加者人身安全，仲話去親都畀人鬧，點解要咁委屈？在任保安局局長時喺立法會被示威者圍堵座駕嘅葉劉淑儀就話，無論維園阿伯或維園阿哥，基本上論壇都係嘈喧巴閉，並非一個良好討論平台，所以即使港台邀請，佢都唔會去。至於民建聯李慧琼、經濟動力林健鋒及梁君彥就話要杯葛至論壇秩序改善為止。

CY陳茂波冇有怕照出席

不過，同屬建制派嘅會計界陳茂波同行會召集人梁振英（CY）就異口同聲話如果討論議題適合，都會以「雖千萬人吾往矣」精神，不畏懼出席論壇，但CY強調討論問題一定要文明，正所謂「相嗌唔好口」嘛！「金勞詹」詹培忠就好勇猛話論壇啲人搞乜嘢都無所謂，佢驚都未驚過，去唔去係要睇心情喎，認真有性格！「金勞詹」去年喺論壇上不斷被人打斷話柄，憤然離場抗議。

今日城市論壇將討論修訂後嘅政改方案，無建制派議員好難成事，好彩身兼基本法委員會委員嘅民建聯監委會副主席譚惠珠肯頂硬上，與政制及內地事務局局長林瑞麟及全國政協委員劉夢熊，舌戰白鴿黨劉慧卿及公文袋余若薇，料有一番激辯，且看港台如何維持秩序。