政情：周澄補選怕影響岸西
成功進身5.16補選候選人嘅學聯前秘書長周澄早前被揭有個金像編劇媽咪岸西，佢就係憑電影《甜蜜蜜》獲獎無數嘅編劇家岸西，自此周澄頭上即刻多咗個光環。周澄尋日出席選管會簡介會時雖然話呢個光環無令佢感到困擾，不過就唔係好想大家再提自己嘅媽媽，因為驚太多輿論反而會影響媽咪嘅工作喎。
周澄仲自爆話之前決定參加所謂嘅「五區公投」時，其實無正式得到父母嘅同意，但好彩爸爸同媽咪岸西都係開明同支持民主嘅人，所以依家都好支持佢繼續參選。佢又話一開始參選都預咗可能會畀人打壓，所以佢依家都驚成日要返大陸嘅岸西會因為自己而過唔到境，希望大家第日都係關心佢嘅議題多過佢嘅家事喎！
咁周澄會唔會叫岸西搵班演藝界人士幫佢拉票呢？周澄就話從來無諗過，不過如果有人真係想支持佢出選，佢都唔會太抗拒。佢又呻現時籌備選舉經費進度好慢，只係籌到四萬左右，距離廿五萬嘅目標好遠，所以都未必搞到太多選舉活動嘞！