政情：鬍鬚曾炒冷飯等收工

鬍鬚曾成個演說大半時間用嚟介紹香港經濟發展史，佢由五十年代韓戰及對華禁運，到七十年代石油危機同七三股災、一路講到八十年代香港前途問題，之後就好空泛咁描述吓粵港合作嘅「美好」前景作結，及至問答環節，不論台下問金融發展又好，六大產業嘅進度也好，鬍鬚曾照舊將預算案嘅措施係咁意講一下作回應，總之就係一款等收工嘅態度啦。

鬍鬚曾尋日以六、七十年代嘅偷渡潮作開場白，話以前內地人偷渡來港，會一直向南行，直到見到有光嘅地方就知去到香港喇，不過佢話如果依家仲有偷渡客去到中港邊界，以為較黑嗰邊係內地，咁就會去錯地方，以此暗指內地發展迅速，不過，唔知佢講呢番話時，有冇反省過令香港呢顆「東方之珠」愈來愈黯淡無光，唔多唔少都係因為佢同煲呔曾施政不善所致呢？