政情：霍啟剛獲廣亞委要職
霍家兩位公子最近都同廣州結緣，尋日啱啱先講完首次進身做廣州市政協委員嘅啟山，喺市政協會議處女提案，要借亞運東風傳揚廣東價值，鑄煉廣州成為一線國際城市品牌。咁啱阿哥啟剛即日就接旗，被廣州亞組委委任做廣州亞運會香港賽會志願者隊伍團長，幫手帶領招募同培訓香港志願者嘅籌備工作，啟剛同香港志願者協會嘅主席葉振都喺青聯合作無間，今次再度一齊發功，一定會搞好件事。
啟山提案，建議廣州市政府將「廣州榮譽市民」名銜授予國際奧委會主席羅格等名人，啟剛係香港奧委會副義務秘書，同羅格老友鬼鬼，上次北京奧運，羅格喺百忙之中，都抽唔少珍貴時間出嚟同香港嘅志願者見面，啟剛話希望今次廣亞都一樣可以再搵羅格同志願者分享吓。咁唔知佢有無順便幫細佬聯絡羅格呢？「無呀！如果啟山開聲我一定幫手做說客。」
不過講到郭晶晶被人影到佢喺上海脹卜卜行街，佢就話無睇過呢單新聞，仲反問邊度有得睇添。啟剛同晶晶一時傳結婚一時又傳有孕，佢叫大家對傳聞唔好咁八卦喎。