前政府首席經濟顧問郭國全喺○八年劈炮唔撈，去咗港大做經濟金融學院榮譽高級研究員，尋日佢出席獅子山學會經濟論壇時，話本港房屋政策應作根本性改變，事關公屋佔全港樓房一定比重，可惜「租者置其屋」計劃交投量少，所以應該讓公屋自由買賣，提供更多上車盤喎。郭國全身為政府前高官，依家竟然走出嚟教運輸及房屋局局長鄭汝樺（Eva）做嘢，唔知Eva鄭聽唔聽得入耳呢？之不過，公屋質素及維修問題一向為人詬病，想有人買都幾難！