中環出更：大輝推介「正斗」點心
立法會議員林大輝向來識飲識食，早前卓妮喺ifc撞到佢，原來佢準備去「正斗粥麵專家」歎點心飲杯茶攤抖吓，於是卓妮同佢一路吹水一路行去「正斗」。話ifc係政商界名人集中地果然無錯，嗰日同大輝喺ifc短短嘅路程，首先就撞到名駒「好爸爸」嘅馬主袁仕傑，跟住又喺「正斗」撞到前足總主席康寶駒坐定定同朋友撐枱腳。大家果然都係識食之人！
大輝話佢成日同班廠商會兄弟喺中環會址開完會後，就行過去ifc間「正斗」整番碗雲吞麵醫肚，貪佢嗰度夠就腳，嘢食又唔錯，廠商會副會長施榮懷同吳永嘉都係佢嘅鐵腳。大輝貴為議員，知名度有番咁上下，去到「正斗」，連經理都認得佢。
除咗招牌雲吞麵，大輝仲推介「正斗」嘅春卷同蘿蔔絲酥餅，貪佢即叫即炸，熱辣辣新鮮放入口，零舍好食。蘿蔔絲酥餅嘅口感相當鬆脆，咬落去鮮甜多汁，呢個雙重口感令大輝一試再試，唔怪得「正斗」可以入選《米芝蓮指南》港澳推薦名列。