中環出更：余壽寧戴Versace領呔夠狂放
男人着西裝想要有搶鏡嘅效果好唔容易，唔似女人可以千變萬化。早前卓妮出席香港鐘錶業總會晚宴，喺一眾灰灰黑黑嘅男賓客之中，見到條色彩繽紛嘅領呔，即時眼前一亮。睇真啲，原來係德國孖人牌代理商昌興第三代傳人余壽寧（Homer），佢條靚呔係意大利名牌Gianni Versace，難怪咁搶鏡。
Homer性格開朗活潑，着衫最怕枯燥沉悶。佢話男人啲衫同埋呔嘅變化空間唔大，佢唔鍾意咁約束，所以就喺條呔度落手。佢屋企有成五、六十條呔，顏色變化萬千，至於打咩呔就視乎當日着咩顏色恤衫。好似當晚佢條構圖豐富嘅靚呔係粉紅色底，最啱襯件粉紅色恤衫。
昌興一九一七年喺香港成立，至今已近百年，佢哋初期係辦館形式經營，家族生意傳到唔鍾意墨守成規嘅Homer手中，昌興嘅發展就更加多元化啦！Homer雖然成個開心果咁好笑，但做嘢好認真，佢哋最近啱啱攞到康寧餐具代理，又做埋護膚品、酒莊、水療度假酒店添！