中環出更：港大酸枝櫈每張值千萬

捐助設「明德教授席」

尋晚嘅「明德教授席」就職典禮冠蓋雲集，除咗有份捐錢嘅善長仁翁外，教統會主席鄭慕智、港大名譽大學院士張永霖、無綫電視股東兼非執董利孝和夫人、亞洲金融董事長陳有慶等都嚟捧場，當然唔少得港大校務委員會主席梁智鴻同負責核定委任明德教授席嘅顧問委員會主席錢果豐。

人群中，卓妮仲赫然發現久未露面嘅前房屋及規劃地政局常秘梁展文。一問之下，原來佢係嚟支持捐贈者之一嘅好友鍾國昌律師。當年立法會聆訊梁展文過檔新世界中國事件，鍾國昌都被捲入事件，仲上立會力挺好友，大家患難見真情，難怪梁展文都唔避嫌嚟撐佢老友場。

鍾國昌律師（右二）出錢撐港大，老友梁展文（右一）親身到賀，左一為鍾老太、左二為鍾國昌太太。

譚華正（右）捐款兩千萬元獲贈兩張酸枝櫈，笑言要湊足四張開枱打麻雀。

喺一眾善長仁翁之中，獅子會活躍會員譚華正實力最強勁，因為尋日新頒授嘅十個明德教授席當中，譚華正就佔咗兩席，即係捐咗兩千萬元。卓妮問佢會點樣用嗰兩張酸枝櫈，佢無正面回答，但就好豪爽笑謂：「兩張點夠吖！」佢話要湊夠四張，再攞埋徐立之私人送嘅靚枱嚟打麻雀喎，身邊嘅譚太笑住點頭，陪伴在側嘅港大職員聽到都笑到見牙唔見眼。

港大有大function，身為港大校務委員會主席嘅梁智鴻就會現身。

港大籌款，捐贈者每捐款一千萬元，即可獲贈仿明酸枝櫈。

雖然港大又有進帳，但掌門人徐立之依然好惆悵。佢同卓妮呻話，為咗迎接「三三四」新學制，佢哋加緊興建新校園嘅「百年校園計劃」，總共需要款項十五億元，而且要喺二○一二年落成，但佢哋到依家都仲有十一億元未有着落，睇嚟徐立之要落力啲揼人心口喇！