政情：啟山提案幫廣州升呢

港協暨奧委會會長霍震霆三位公子，一向都係傳媒嘅焦點，呢個由霍老霍英東開創嘅體育世家，去到邊都離不開體育。早前大佬啟剛以委員身份出席天津市政協會議時，就為舉辦下屆東亞運嘅天津市政府進言，大談香港搞東亞運嘅經驗。話口未完，首次進身廣州市政協委員嘅二佬啟山，尋日出席市政協會議時，亦首次處女提案，題目係：「借乘亞運東風傳揚廣東價值，鑄煉廣州一線國際城市品牌」。佢建議廣州市政府向國際奧委會主席羅格等名人授予「廣州榮譽市民」名銜，又或者將廣州亞運嘅開幕日定為運動日，咁樣可借亞運個勢，將廣州「升呢」為一線國際城市喎。