政情：五白鴿撐河蟹世博團

上海市政府邀請立法會議員喺補選前參觀世博，白鴿黨劉慧卿上星期已講明，除非內地發番十年回鄉證畀佢，否則唔使預佢。尋日白鴿黨開完黨團會議後，決定派五隻白鴿撐世博團，但正、副主席何俊仁（圖）同卿姐就留番喺香港。白鴿黨尋日開完黨大會後，主席何俊仁就公布，李永達、涂謹申、李華明、張文光同鄭家富五位白鴿黨議員會跟世博團去上海，喺佢哋九個議員中，去咗一半有多，但鐵頭仁話，自己就因為媽媽入咗醫院而決定唔去。佢仲話，雖然佢都好唔滿意內地成日限制黨友返內地，但覺得唔應該就咁放棄返內地體驗同考察世博香港館嘅機會喎。