政情：胡文新齋捐錢唔睇世博
上海世博會五月一日開幕，港府雖已獲立法會撥款近三點五億元籌辦整項活動，但仍唔放過向港企揼心口嘅機會，捐助最多嘅「鑽石」贊助機構就有三間，港府開價高達五百萬元以上，國泰航空、滙豐銀行同新創建都躋身其中，加埋廿幾間捐唔同銀碼嘅贊助商，籌咗幾千萬元！
尋日港府隆而重之搞咗個致謝晚會，捐咗唔少嘅合和實業董事總經理胡文新（Thomas），百忙中都抽空撐場。問佢會唔會去睇世博？Thomas話佢啱啱喺上海返嚟，世博舉行期間佢好忙，應該唔得閒去睇嘞！佢又有感而發話，上海夏天好熱。盛夏嘅上海的確係個火爐，唔知Thomas係咪因為咁而唔去世博呢？
「眾人媽打」李麗娟以龍傳基金身份幫港府籌咗百幾萬，佢話六月底會帶四百位中學生去上海參觀世博，六月卅日係佢生日，到時會喺上海過。國泰董事莊偉茵就話，雖然五月一日世博開幕日撞啱五一勞動節，但暫時無諗過申請加班航機疏導乘客。