政情：劉遵義「釣魚」無視星雲致辭
有「政治和尚」之稱嘅台灣星雲大師近月成為訪港常客，繼日前喺紅館主持皈依受戒儀式後，尋日又馬不停蹄到中大出席活動，不過中大校長劉遵義喺活動上，當住大師瘋狂「釣魚」，認真唔畀面！
星雲大師一向熱心喺各地弘揚佛法，早於○五年，佢已經代表佛光山文教基金會，同中大簽訂第一期合作協議，仲喺中大成立「人間佛教研究中心」，推動佛學研究。事隔五年，星雲大師再嚟到中大簽訂第二期協議，更以基金會嘅名義，捐贈七百五十萬元畀呢個研究中心添。
星雲大師讚揚中大係世界頂尖學府，形容今次再度合作係「好有意義、好重要的一件事」。不過再有意義嘅事，似乎都敵不過周公嘅奪命追魂call。只見尋日劉校長喺星雲大師致辭時，已經不斷嘗試抖擻精神，叫自己唔好瞓，但後來佢終於支持不住，不斷「釣魚」，醒一醒又偷偷地望吓大家，搏大家唔發現。劉校長新婚燕爾，應該係神彩飛揚至係㗎！