政情：淥傷Ｂ周一鑊蘇利民鬥卸膊

為咗瑪嘉烈醫院滾水淥傷男嬰一事，食物及衞生局局長周一嶽尋日竟然同醫院管理局行政總裁蘇利民喺公開場合鬥卸膊！周一鑊直指呢件醫療事故係人為錯誤，應該盡快向公眾同當事人交代，仲話唔明白點解醫院要用六個禮拜時間，先交到調查報告，暗批係咪有人有心隱瞞。同場嘅蘇利民就反駁話，用咁長時間調查，唔單止要搵出邊個要為事件負責，而且仲要諗辦法唔畀事件再發生。其實「相嗌唔好口」，依家最重要係醫好男嬰傷患。