政情：建制派唔玩維園論壇？

由香港電台舉辦嘅《城市論壇》，廿九年來不乏激進場面，維園阿伯以大聲公疲勞轟炸民主派嘅場面，市民司空見慣。維園阿伯爆粗，總算動口不動手，然而，論壇最近多咗唔少肢體動作，好似「廿蚊張」被人掟廿蚊紙、方剛同何鍾泰被戴住豬、狗面具嘅「八十後」包圍，要由警方協助離開，連直選出身嘅劉江華，亦難逃被圍，依家建制派議員上得論壇都要心中掛個「勇」字。

維園阿哥惹造勢疑雲

尋日問方剛點解咁神勇，明知山有虎，都夠膽上論壇同民主派爭辯功能組別存廢。佢自爆，工商界功能組別無人夠薑據理力爭，佢咪身先士卒囉，而且原本論壇份嘉賓名單有金融服務界詹培忠，佢諗住金勞詹一向言論惹火，肯定成為焦點，點都未輪到佢啦，點知金勞詹甩底，搵何鍾泰頂替，咁就搞到佢變成眾矢之的。提起喺論壇被「八十後」圍攻，方剛猶有餘怒，直指論壇已失控，台下嘅人一味鬧人，唔畀人講嘢，建制派議員真係要考慮吓係咪值得上去做箭靶。

金勞詹去年中上《城市論壇》辯論七一遊行，因不滿台下社民連成員多次打斷自己發言憤然離場，成為《城市論壇》廿九年來破天荒之舉。尋日問金勞詹，上星期日係咪避咗論壇，佢話上周日中午身在美國返港航班上，夜晚八點至落機，根本唔知《城市論壇》邀請佢。不過佢指論壇已變質，即使獲邀亦多數唔去，以後港台唔使預佢嗰份嘞。嘩！建制派議員自發杯葛《城市論壇》，如果發展到集體行動，咁就有好戲睇囉。

有建制派議員話，《城市論壇》已被社民連當成狙擊建制派議員、製造輿論聲勢嘅平台，好似最近頻頻喺論壇曝光嘅「維園阿哥」、前立法局議員任善寧兒子任亮憲，就係為明年參選區議會造勢，建制派議員如果上論壇激辯惹火議題，客觀效果等如送彈藥畀人；不過，任亮憲否認係喺論壇上狙擊建制派，係為區選鋪路或有任何政治動機，又話唔信建制派議員會杯葛論壇喎。