中環耳目：馬志文愛鏞記外賣油雞飯
建設銀行舊年勁賺千幾億人民幣，股價又大翻身，唔少股東都賺到笑，相信啱啱榮休嘅建行（亞洲）前行政總裁馬志文（Charles）都值得記佢一功。Charles公務繁忙，中午成日食應酬飯，所以無飯局時佢會叫至愛嘅鏞記油雞飯外賣去祭吓五臟廟。
Charles喺中環置地廣場返工，佢話如果無應酬，其實附近可以選擇嘅食肆唔係太多。過去十年來佢慣咗叫鏞記嘅外賣，最喜歡油雞飯，有時胃口好啲就叫多碗粥或油菜。佢盛讚鏞記嘅食物水準保持穩定，粥品嘅選擇好多，可以日日唔同款，必食之選係艇仔粥、牛肉魚片粥等。
鏞記知名嘅不只燒鵝咁簡單，佢哋都有好多招牌菜式，單係外賣粥品都有幾十款，由十幾元嘅白粥到九十五元嘅鮑片粥，豐儉由人，好似Charles推介嘅牛肉魚片粥，三十元有交易。以鏞記嘅江湖地位同食物質素嚟講，都算抵食！