中環出更：董吳玲玲忙仁濟唔做facial

董太預咗做主席後忙到飛起，笑言即使唔做facial，都要熱心公益喎。

同「弟弟」齊心撲水

就職禮喺君悅舉行，仁濟前主席吳守基正式交棒；理文造紙董事總經理李文斌（Edmond）亦榮升副主席。做得主席預咗籌款壓力唔細，但嬌滴滴嘅董太就話唔驚，佢話最緊要做實事，畀人睇到仁濟醫院嘅真正需要。

佢又拍拍副主席Edmond膊頭，指兩人感情親如姊弟，如此齊心，「撲水」無難度。

董太瞓身做公益，背後原來有人撐腰，係邊位？之唔係老公董生囉。佢甜笑話，先生係上海人，非常懂得體貼太太，閒來煲花膠靚湯氹佢開心，飲完皮膚又白又滑。

副主席Edmond都唔弱，家有賢妻何芷韻（Amanda），太太懷有龍鳳胎添，六月為李家增添一個「好」字嘞。

Edmond真識做，佢打算送神秘禮物慰勞太太，亦會考慮買番匹靚馬，等BB長大之後可以一嘗馬主滋味。不過講到幫BB改名，就要交由爺爺「造紙大王」李運強出手嘞，事關BB改名係要跟族譜喎。