中環出更：徐立之買餸煮飯親力親為

上周一（五日）係清明節，亦係公眾假期，中午一點幾，徐校長現身ifc間city'super掃貨，徐太亦夫唱婦隨陪伴在側，咁啱畀卓妮撞個正着。卓妮現場所見，喺外國生活多年嘅徐校長，對行超市並不陌生，全程由佢攞購物籃，等太太輕鬆揀靚貨，盡顯男士風度。

兩人行到售賣日本刺身嘅凍櫃前顯得好雀躍，原來徐校長忽然想食魚，見到魚生咁新鮮，當然食指大動，二話不說揀咗一包肥美三文魚刺身同吞拿魚刺身，徐太當然和應。

放大圖片	徐立之早前與妻子聯袂一齊出席一個頒獎禮。 （資料圖片）

不過齋食刺身唔飽肚，徐校長買多兩磅方包，然後加多一杯原味乳酪及一大盒澳洲新鮮牛奶，營養夠晒豐富。咁飯後果食乜好呢？徐校長喺生果專櫃前盤算咗一陣，最後掃咗一梳香蕉同兩個檸檬。埋單計數，呢餐唔貴，但營養價值十分高，可見校長係注重飲食健康之人，肥膩嘢免問。卓妮問校長是否鍾情食魚生，佢笑騎騎話，啲魚無骨，食完乾手淨腳。

屋企無請工人

卓妮等校長排隊等畀錢之際，上前同佢打招呼。佢爆咗個小秘密畀卓妮知，原來佢屋企無請工人，買餸都要親自出馬。查實以校長今時今日嘅人工，請兩、三個工人閒閒哋，但佢習慣凡事親力親為，唔覺得買餸係苦差，呢個星期就幫襯咗city'super兩次添，認真難得！