官逼民反「海悅」擬封橋

青衣海悅花園行人天橋連接楓樹窩路及青敬路，天橋由屋苑擁有及管理。運輸署年前擬斥資一千九百萬元興建新橋連接附近碼頭、巿政大廈行人通道及現有公眾天橋。工程去年六月展開，預計明年初竣工，但政府至今仍未能與居民就維修責任達成協議，雙方爭拗近日更告升溫。

假諮詢企硬施工

「明明將依家條橋變成公眾天橋，但係管理費又要我哋畀，咁咪好唔公平？」海悅花園居民池先生不滿路政署與運輸署「假諮詢」，硬推工程上馬，「佢哋口口聲聲話做諮詢，嗰日路政署有份出席嘅居民大會大家明明反對，唔通咁就叫順從民意？」池認為當局應先行解決天橋維修問題，然後再落實施工安排。

「政府部門喺區議會present（匯報）通常都好片面，區議員就算想拎多啲資料，唔係後補就係拎唔到！」葵青區議員徐曉杰認為，倘居民一致反對，政府便不應強行接駁天橋，「原本條橋係私人擁有，（條橋）搞成點係業主嘅事，如果政府無端端將公眾設施駁過去，又唔傾點維修就真係好有問題！」

徐曉杰（左）行經海悅花園行人天橋時遇上居民「攔途訴苦」，不滿當局無視居民反對意見。

工地附近掛滿反對橫額，要求政府釐清維修責任誰屬。

議員斥掩人耳目

立法會民政事務委員會委員王國興則認為，事件反映政府有意藉區議會諮詢「過橋」，凌駕地區民意，做法有掩人耳目之嫌，「居民反對政府當睇唔到，咁就係政府唔啱在先，就算搞到封橋都係官逼民反！」王指倘政府最終仍執意建橋，亦應與業主分擔維修及保險費用，有需要時更應購入天橋，避免深化官民矛盾。

海悅花園業主立案法團發言人指出，早於○八年路政署出席簡介會期間，居民已提出強烈反對，及後政府部門開始進行工程前期工作，法團亦已要求延遲工程直至獲覆天橋維修的清晰方案為止，惟該署仍堅持開工。發言人續指，短期內不排除會進行封橋行動，一切有待與居民溝通再作決定。

對於被指諮詢不足一事，運輸署及路政署發言人僅回應稱，曾於○五年在葵青區議會交通及運輸委員會會議討論問題，有關建議文件最後獲委員會通過。

方先生：「政府成日唔聽市民意見，以為做嘅嘢啱晒，再咁落去隨時嘥晒啲公帑！」

楊太：「每次帶個孫返學都會經過（海悅花園）條橋，第日駁通咗政府都好應該幫手維修！」

業權糾紛釀封橋有前科

行人天橋業權糾紛釀成封橋事件早有前科。連接李鄭屋邨及寶麗苑的保安道天橋原由房屋署負責管理及維修，自李鄭屋邨於○四年列入出售公屋計劃後，房署即更改地契並要求寶麗苑接管天橋，結果遭業主立案法團以移交手續未清而拒收。○七年十月，保險公司更以天橋欠缺維修保養為由，決定退保，屋苑管理公司遂將天橋入口封閉，居民被迫使用橋下馬路往返，同年十二月，一名老婦便於橫過馬路時遭輕型貨車撞斃。

■記者 梅可茵