政情：李本瀅傳奇前半生
啱啱上任一年嘅天文台台長李本瀅平日作風低調，唔講唔知，台長有好傳奇嘅前半生，小時候屋企最富有時屋前屋後有花園、又有司機、工人有好幾個，但最窮時可以連電費、電話費都無錢交，咁啱佢考大學時屋企最窮，唔似三個阿哥咁可以去留學，搞到佢曾經思想好偏激好反社會，好彩有做心理學家嘅太座輔導先唔會諗埋一邊。
李本瀅接受電台訪問時提起屋企有六兄弟姊妹，佢排行第四，細個屋企環境好，「一個細路有一個工人跟」，可惜爸爸唔識風險管理，有時去到好盡，最差時搞到屋企連電話都截埋，聽到同學仔話打唔到電話畀佢時覺得好慚愧，但又無能為力。
李本瀅話，到佢考大學時屋企負擔好大，佢只可以考本地大學，好彩最終考到，第一年學費仲係爸爸問已經反目嘅「茶葉大王」爺爺借，至於生活使費就要佢補幾份習自己顧自己啦。
新任台長其實仲有一年就退休，佢話依家心情平和，期待人生另一個開始，預計退休生活仲有卅年，所以會計劃吓做吓義工咁，免得坐喺屋企太耐精神會出問題喎。