政情：葉劉帶80後坐高鐵
香港政壇近期掀起一股「高鐵熱」，試搭高鐵幾乎成為政界人士北上嘅必備節目，匯賢智庫主席葉劉淑儀唔執輸，日前帶班香港大學生坐高鐵上武漢考察，除咗畀大家一嘗坐高鐵嘅快感外，仲參觀武漢鋼鐵廠，近距離睇工人煉鋼倒鋼水，新鮮刺激，令一班未見識過重工業嘅香港青年開心到依嘩鬼叫。
匯賢智庫武漢考察團玩咗三日，葉劉話，坐高鐵真係好正，架車最高時速上到三百四十八公里，為咗測試車身喺高速之下嘅穩定性，佢仲喺車廂之內表演金雞獨立，最後證明架車真係好定。
「八十後」成日被人話激進，葉劉同一百二十個「八、九十後」同出同入三日，有乜感受呢？佢話，雖然依家樓、股齊升，但個市其實並非表面睇咁好景，好多後生仔都搵唔到工，所以年輕人感到鬱悶係有原因㗎。本身係百煉鋼嘅葉劉帶班大學生去睇煉鋼，唔知有冇深層意義，要佢哋好似鋼一樣千錘百煉呢？