政情:查太話當年打工唔諗上位

同「八十後」有關嘅話題持續受到關注,尋日第二十七屆大專辯論賽決賽,辯題都係「香港『八十後』上位難」,反映社會對呢班後生仔嘅處境好關心,四、五十後嘅評判現身說法,話佢哋年少時只會埋頭搵工同做嘢,唔會諗到上位嘅問題。

黃華麒明白年輕人困難

評判之一、大學教育資助委員會主席查史美倫慨嘆,佢後生時只諗過搵份工,尋找自己嘅價值,然後將份工作做到最好,冇諗太多「上位」嘅嘢。佢唔明點解依家上位變得咁重要,話其實係啲人對上位嘅期望提升咗。

同樣身為評判嘅廣播處長黃華麒話,佢嘅子女都係「八十後」,佢好明白依家年輕人面對嘅困難。佢又話自己係《獅子山下》年代出世嘅人,第一份工作就係做廣播員,當時由朝做到夜晚十一點至放工,係佢自願嘅,而且個個都係咁。不過佢一啲都無睇小時下嘅年輕人,佢讚揚尋日出賽嘅學生辯才好,話如果佢當時有咁嘅天分,再加埋勤力,相信前途無可限量。

辯論賽最後由科技大學奪冠,嶺南居次,樹仁及港大並列第三。