政情：教協新當家抗拒做白鴿

恐失教育界議席

教協係本地最大教師組織，競逐立法會教育界議席可謂手到拿來，未逢敵手，作為教協會長嘅張文代表教協出選，令白鴿黨得以坐擁呢個議席廿年之久，成為白鴿黨議會版圖上嘅堅固堡壘。不過，隨着張文一退，白鴿黨呢個城堡變得危危乎。

教協尋日完成領導層改選嘅點票程序，唯一候選班底「馮偉華閣」以獲九成七信任票無風無浪當選。馮偉華尋日同我哋講起參選立法會，佢話會考慮三個因素，即會員支持度、兼顧教職同家人睇法，但強調如果教協需要佢，佢就去做！睇嚟佢對參選已經做足心理準備。

馮偉華唔抗拒做議員，但係相當抗拒入政黨。馮偉華話，至今未有政黨邀請佢加盟，至於最終會否做白鴿人，佢話，到真係向佢招手時至算。不過，聽馮嘅語氣，對加盟一事興趣似乎就好冷淡嘞。原來馮偉華喺八十年代時做過匯點成員，但對政黨一向有戒心，當匯點同港同盟合併，變身民主黨，佢就全身而退，只論政，不參政。所以，自斷政黨之路廿年，今日要佢食回頭草，真係唔係佢杯茶哩！

馮偉華仲話，年輕時諗起國共兩黨鬥生鬥死，對政黨好大戒心，雖然家陣香港啲政黨斯文咗，但係喺香港呢個畸形政治生態下，政黨作用有限，真係令人無乜意欲入黨，除非香港政黨政治成熟到好似英美一樣由兩個大黨輪替做執政黨，或者出現一個極具代表性嘅跨階層政黨啦，如果只係扮演反對黨角色，咁就無意思啦。馮偉華有幾大機會加入白鴿黨，呼之欲出啦。

據聞白鴿黨打算游說馮偉華加盟，延續該黨喺教育界別嘅影響力。可惜，睇形勢，白鴿有心，襄王未必有夢。