中環耳目:趙韋嘉回味Zeffirino龍蝦寬條麵

意大利菜係好多老饕心目中嘅終極美食,卓妮早前見到富豪資產管理公司執行董事趙韋嘉(Francis),佢都係意菜嘅忠實擁躉,推介首選係連前教宗若望保祿二世都被迷倒嘅Zeffirino。

Francis話佢經常去富豪香港酒店三十一樓嘅Zeffirino食飯,最喜歡佢哋嘅招牌菜龍蝦寬條麵。呢個菜式最大特色係自製麵條軟硬適中,再配以新鮮龍蝦肉同埋濃濃嘅番茄醬汁,令人一試回味無窮。Francis又勁讚餐廳嘅氣氛一流,可以環視維港靚景,服務質素保持喺水準之上,最啱鍾意享受嘅食家一試。

Zeffirino源自意大利,已有七十年歷史,九年前引入香港。相傳佢哋家族喺三百幾年前獲得一本皇室菜譜,佢哋從中取得烹飪秘訣,世代相傳,因此Zeffirino被全球食家視為殿堂級食肆,江湖地位好高。佢哋外國分店吸引好多名人捧場,包括球星馬納當拿、著名影星蘇菲亞羅蘭、Celine Dion等。

卓妮