中環出更：高佩璇戴翡翠提升正能量
玉價近年不斷上漲，吸引城中名媛投資玉石。頂級翡翠稀少，正是千金難求。潮屬社團總會名譽會長高佩璇嘅珍藏裏面，有一粒如雞蛋般大嘅翡翠吊墜，吊墜玉身通透光潤，散發養眼嘅綠色光芒。
高佩璇與翡翠之間，有着微妙嘅化學作用。佢話，翡翠散發一種正能量，戴上後心情分外開朗祥和，自從十年前初次遇上翡翠，就一見鍾情。早前高佩璇出席「潮總」就職禮，除咗戴住玉墜，仲有翡翠戒指，佢話原來兩者都產自緬甸，價錢幾多就唔講嘞，卓妮一睇，翡翠從內而外發出溫潤光澤，價值唔嘢小。
揀翡翠向來學問多，魚目混珠者多不勝數。高佩璇分享揀翡翠心得，首要睇色澤、透明度及純淨度，晶瑩剔透、鮮艷明亮又帶水潤光澤，咁就正嘞。聽落好似好易，查實揀起上嚟極考眼光。現時全球翡翠儲存量非常有限，遠比鑽石及其他珠寶稀少。高佩璇惜玉如金，佢話就算珍藏如今大幅升值都唔會賣喎。
除咗高佩璇外，電視廣播有限公司董事利孝和夫人同中大校董方劉小梅都係翡翠迷，利夫人尤愛價值連城嘅老坑翡翠，方太就喜愛台灣珠寶設計師設計嘅翡翠首飾，各有所好。
卓妮