政情：林偉強「作反」撐補選
包括鄉議局在內嘅各個主要建制派團體，早前決定聯手杯葛公社兩黨發起嘅「五區公投」。其中身兼行政會議成員嘅鄉議局主席劉皇發，就公開批評過今次補選「冇需要、冇意義」，會全面杯葛。鄉議局副主席張學明更加話有啲反對「公投」嘅鄉紳，嬲到唔想借啲村校出嚟做補選投票站。不過被私吞津貼醜聞纏身嘅另一鄉議局副主席林偉強，尋日竟然同鄉議局唱反調，話自己一定會盡公民責任出嚟投票喎！
身兼離島區議會主席嘅林偉強尋日為東涌社區會堂主持開幕禮，問佢下個月會唔會出嚟投票，佢就好似好醒咁話：「四區補選吖？」其實係五區補選先至真。佢又話自己唔單止會去投票，盡公民責任「選賢能」，仲會着力呼籲其他市民投票添。唔知佢係咪畀單醜聞搞到冇乜時間睇報紙，唔知道發叔同學明之前講過啲乜，定係有心同兩人大唱反調呢？
林偉強又話私吞津貼單嘢佢已經報咗案，所以不便多談，不過就澄清，話早前佢缺席西貢車公古廟嘅重開典禮，係有事先請假嘅，唔係如外間所言咁忽然甩底「避傳媒」，只係一場誤會喎。