政情：李少光外遊關注泰局勢
泰國局勢持續緊張，出現大規模反政府示威活動，保安局早已將外遊警示提升到紅色級別，仲唔排除提升到黑色級別添。就喺緊張時刻，保安局局長李少光大膽放假五日，尋日同家人啟程去日本東京旅行，下周二返港。不過光哥嘅新聞秘書就強調，佢老細會喺東京隔空密切關注泰國局勢，加上今次有保安局副局長黎棟國留港，以署理局長身份睇實，有乜依郁就會採取相應行動喎！
○八年底泰國局勢混亂，大批港人滯留泰國，當時光哥去咗日本公幹，因為遲咗安排包機接載港人返港而要孭鑊道歉，自此變成驚弓之鳥，放假都唔敢遠行。咁啱呢兩年復活節假期都撞正泰國局勢不穩，去年光哥只係近近哋到內地打高爾夫球輕鬆吓，點知今年復活節仲大劑，搞到紅假都唔敢放，拖到尋日至起行。
講番光哥嘅東京之旅，除咗太太隨行外，仲有兒子霖恩一家三口、女兒卓穎及夫婿姚舜城。卓穎啱啱喺上周六新婚之喜，理應係時候去度蜜月，但現在反而同家人旅行，莫非一次過家庭樂兼度蜜月？