政情：壁球健將麥珮軒退役讀中醫
以前大家都會覺得喺香港做運動員前途麻麻，不過近年香港運動員屢創佳績，大家對體育界嘅支持多咗，令退役運動員多咗好多出路。好似香港壁球代表麥珮軒，最近就被中大中醫學院收咗，今年九月就會入讀為期六年嘅中醫中藥學位課程。
珮軒做咗運動員十幾年，○○年喺第十屆亞洲壁球錦標賽女子團體項目中勇奪金牌，○六年又喺多哈亞運單打賽贏咗銅牌，去年香港東亞運又喺女子團體項目奪金，成績卓越。不過做得運動員，新傷舊患唔少得，加上佢父母長年接受中醫治療，令佢對中醫產生濃厚興趣，所以立志退役之後要投身中醫事業。為咗做足準備，兩年前佢仲開始修讀中醫同針灸嘅課程添，相當勤力。
珮軒今次得到體育學院資助大學學費，中大方面亦有獎學金畀佢，但生活費就要靠自己喇！
唔知大家記唔記得珮軒○八年做過奧運火炬手，之後佢捐咗支火炬同火炬手服飾出嚟拍賣賑災，畀熱愛運動嘅立法會議員林大輝以一百八十萬元投咗，再轉送番畀珮軒。珮軒話佢同林議員唔認識，只係有次喺九龍仔運動場見過對方跑步，但就唔敢打擾對方。