政情：立會世博團衰收尾?!

立法會秘書長吳文華（Pauline）尋日向內會匯報，下月八日出發嘅世博團唔理幾趕，都會坐高鐵上、搭飛機返，以便內地嘅鐵道部專家同港府高級工程師，沿途為議員講解高鐵究竟有幾勁。今次成個團全程都只得三日兩夜，單係交通已經嘥咗成日，仲趕過坊間好多雞精鴨仔團。

班議員長途跋涉抵達上海世博會場後，除咗會循例國家、香港同澳門嘅展館，上海當局仲特別安排佢哋睇埋英國、美國同日本館，到最後一日再去埋城市最佳實踐區，然後趕喺晏晝四點鐘走，以便趕搭夜晚七點鐘直航機返香港。雖則佢哋係以特別嘉賓身份到訪，可以打尖唔排隊入場，但要喺一日多之內行足七個展館同場區，到底可以考察到啲乜嘢，真係好成疑問。

今次行程除咗超趕之外，團費亦都係超貴。Pauline話按照一般公務員去上海三日兩夜嘅津貼計，大概需要九千五百元人民幣，當中四千幾係交通費，其餘就主要係膳食。旅遊界議員謝偉俊就話，早前佢自行建議立法會搞番個四日三夜高鐵世博團，都只需三千三百八十八，質問究竟點解要咁貴。Pauline就強調呢個數係粗略估計嘅上限，秘書處仲計緊條實數，又話筆錢會喺每位議員嘅定額外訪津貼度扣，好似講納稅人付鈔找數就唔使慳住使咁。

卿姐誓言唔返內地

之前已經有多名泛民議員講明會杯葛今次世博團，其中民主黨副主席劉慧卿尋日更加表明，除非內地當局徹底改變做法，向包括佢在內嘅無證議員重發十年期回鄉證，否則佢今後都唔會參加呢類一次過嘅政治騷內訪團：「有我劉慧卿喺立法會一日，都唔會有全體議員（訪內地）﹗」估計喺卿姐作出有關誓言之後，好多原先舉棋不定嘅泛民議員，都會縮沙齊齊杯葛，令世博團愈搞愈少人。

正所謂最怕貨比貨，我哋八到東區區議會主席丁毓珠聯同東區區議會及銅鑼灣街坊福利會約六十人，亦喺下個月搞咗個世博團，去足五日四夜兼住埋五星級酒店，都只須四千蚊港紙，令立法會呢個又貴又趕又多人杯葛嘅世博團加倍相形見絀。