中環出更：梁定宇有個超人老婆

喺香港要做個超班靚太，有齊ＩＱ、ＥＱ之餘仲要夠cute，總之外觀要靚內涵要正，仲要無港女特質、公主病患。聽落好似好難，不過運氣話嚟就嚟，六合彩都有人中，要娶個好老婆，其實都唔難。就好似今屆東華主席梁定宇，之前就喺就職晚宴公開讚老婆係超人，到底梁太有幾「超」呢？

梁太張雅麗Carol本身喺英孚（ＥＦ）教育集團負責公司嘅內地發展，又幫喺內地做廢紙回收嘅老公家族上巿公司福和集團做非執董。每個月有三分之一時間都無得返屋企瞓覺，又要照顧四歲囝囝兼做補習老師，仲要keep住個靚樣，聽落都真係幾唔得閒。

外表嬌滴滴嘅Carol，六年前由張小姐轉做梁太，好多朋友都估佢會做個弱不禁風嘅少奶奶，誓估唔到蕙質蘭心嘅佢原來咁捱得。家下一人分飾幾角嘅佢，愈忙愈起勁。Carol話做女人要學識平衡時間，將家庭放喺第一位嘅同時，亦要有自己事業，唔好同社會脫節。

不過唔好以為Carol淨係得個做字，游水、做mask、行街買衫，仲有每星期一次嘅按摩療程，一樣寫得落佢本密質質嘅行程簿內，仲要係同奶奶行孖必。梁太，難怪你老公讚你係超人！

卓妮